tujhe kho kar mohabbat ko ziyāda kar liyā maiñ ne
ye kis hairat meñ ā.īna kushāda kar liyā maiñ ne
mujhe pechīda jazboñ kī kahānī nazm karnā thī
so jitnā ho sakā uslūb saada kar liyā maiñ ne
mohabbat kā sunā thā zaat kī takmīl kartī hai
magar is aarzū meñ ḳhud ko aadhā kar liyā maiñ ne
shikast-e-ḳhvāb par hī ḳhvāb kī buniyād rakhnā thī
dar-e-imkān phir se īstāda kar liyā maiñ ne
na.ī rut meñ mohabbat kā i.aada chāhtā thā vo
purāne tajarbe se istifāda kar liyā maiñ ne
sar-e-sāhil mujhe pīchhe se ab āvāz mat denā
yahāñ se paar jaane kā irāda kar liyā maiñ ne