rahīn-e-ḳhvāb huuñ aur ḳhvāb ke makāñ meñ huuñ
jahān mujh se sivā hai maiñ jis jahāñ meñ huuñ
ajab tarah kā ḳhirad-ḳhez hai junūñ merā
mujhe ḳhabar hai maiñ kis kār-e-rā.egāñ meñ huuñ
tū mujh ko pheñk chukā kab kā apne dushman par
maiñ ab kamāñ meñ nahīñ huuñ tire gumāñ meñ huuñ
mirī thakan bhī tirī hijratoñ meñ shāmil hai
maiñ gard gard sahī tere kārvāñ meñ huuñ
ulajh paḌā thā maiñ ik roz apne saa.e se
aur us ke ba.ad akelā hī dāstāñ meñ huuñ