tum se ik din kahīñ mileñge ham
ḳharch ḳhud ko tabhī kareñge ham
ishq! tujh ko ḳhabar bhī hai? ab ke
tere sāhil se jā lageñge ham
kis ne raste meñ chāñd rakkhā hai
us se Takrā ke gir paḌeñge ham
āsmānoñ meñ ghar nahīñ hote
mar ga.e to kahāñ raheñge ham
dhuup niklī hai terī bātoñ kī
aaj chhat par paḌe raheñge ham
jo bhī kahnā hai us ko kahnā hai
us ke kahne pe kyā kaheñge ham
rok leñge mujhe tire aañsū
aise paanī pe kyā chaleñge ham
vo sunegī jo sunñā chāhegī
jo bhī kahnā hai vo kaheñge ham