niiñd se aa kar baiThā hai
ḳhvāb mire ghar baiThā hai
aks mirā ā.īne meñ
le kar patthar baiThā hai
palkeñ jhukī haiñ sahrā kī
jis pe samundar baiThā hai
ek bagūlā yādoñ kā
khā kar chakkar baiThā hai
us kī nīndoñ par ik ḳhvāb
titlī ban kar baiThā hai
raat kī Table book kar ke
chāñd dinner par baiThā hai
añdhiyārā ḳhāmoshī kī
oḌh ke chādar baiThā hai
'ātish' dhuup ga.ī kab kī
ghar meñ kyūñkar baiThā hai