itnī shiddat se gale mujh ko lagāyā huā hai

aisā lagtā hai ki vaqt āḳhirī aayā huā hai

kyuuñ na is baat pe ho jaa.eñ ye āñkheñ pāgal

niiñd bhī utrī huī ḳhvāb bhī aayā huā hai

ab ke holī pe lagā rañg utartā hī nahīñ

kis ne is baar hameñ rañg lagāyā huā hai

sochtā huuñ ki use ḳhud ko maiñ in.aam karūñ

ek laḌkī ne tirā bhes banāyā huā hai

aañkh meñ beTī ke aayā thā magar dekho 'ziyā'

ek aañsū ne hameñ kitnā rulāyā huā hai