baḌe salīqe se toḌā mirā yaqīn us ne
ki naam apne hī kar lī hai sab zamīn us ne
tabāh shahr ko pahle kiyā phir is ke ba.ad
hamāre shahr meñ bheje tamāsh-bīn us ne
nibhegā kaise ta.alluq samajh nahīñ aatā
anā kī Dor rakhī hai bahut mahīn us ne
ḳhudā banā ke hameñ pūjne lagā thā vo
bahut ḳharāb kiyā hai hamārā diin us ne
zahīn laḌkī hai vo jis ke ishq meñ ham haiñ
banā diyā hai hameñ bhī bahut zahīn us ne