ishq par zor chal nahīñ saktā
dil sambhāle sambhal nahīñ saktā
aa ke duniyā meñ inqalāb koī
dil kī duniyā badal nahīñ saktā
un kī nazreñ badal ga.iiñ varna
yuuñ zamāna badal nahīñ saktā
rañg-e-hastī hai inqalāb agar
rañg-e-hastī badal nahīñ saktā
aa gayā huuñ vahāñ se ghabrā kar
ab kahīñ dil bahal nahīñ saktā
ishq kī aag meñ jo jaltā hai
vo jahannum meñ jal nahīñ saktā
vo nigāheñ badal ga.iiñ 'bismil'
ab zamāna badal nahīñ saktā