jis anjuman meñ dekho begāne rah ga.e haiñ
gintī ke log jaane pahchāne rah ga.e haiñ
kal jin haqīqatoñ se māhaul mo'atabar thā
aaj un haqīqatoñ ke afsāne rah ga.e haiñ
ab ġhārat-e-chaman meñ kyā rah gayā hai baaqī
kuchh pairahan-darīda dīvāne rah ga.e haiñ
tārīḳh-e-ahd-e-rafta bil-iḳhtisār ye hai
gulshan jahāñ jahāñ the vīrāne rah ga.e haiñ
'iqbāl' DhūñDhte ho tum jin ko mahfiloñ meñ
un kī jagah ab un ke afsāne rah ga.e haiñ