sannāTā tūfāñ se sivā ho ye bhī to ho saktā hai

ye kuchh aur baḌā dhokā ho ye bhī to ho saktā hai

zabt-e-junūñ se andāzoñ par dar to band nahīñ hote

tū mujh se baḌh kar rusvā ho ye bhī to ho saktā hai

rahne de ye harf-e-tasallī merī himmat past na kar

nākāmī hī meñ rastā ho ye bhī to ho saktā hai

DhūñDne vaalā DhūñD rahā hai aur andāz jafāoñ ke

mujh ko vafā kā zaḳhm lagā ho ye bhī to ho saktā hai

laao ik lamhe ko apne-āp meñ Duub ke dekh aa.uuñ

ḳhud mujh meñ hī merā ḳhudā ho ye bhī to ho saktā hai

mujh ko to ye e.azāz bahut hai lekin terī tamannā ne

mere laboñ se kaam liyā ho ye bhī to ho saktā hai

āḳhir apne qadmoñ ko kyuuñ ham mulzim Thahrāte haiñ

rāhoñ ne muñh moḌ liyā ho ye bhī to ho saktā hai

mere tasavvur ne baḳhshī hai tanhā.ī ko bhī ik mahfil

tū mahfil mahfil tanhā ho ye bhī to ho saktā hai