raushan dil-e-ārif se fuzūñ hai badan un kā
rañgīñ hai tabī.at kī tarah pairahan un kā
mahrūm hī rah jaatī hai āġhosh-e-tamannā
sharm aa ke churā letī hai saarā badan un kā
jin logoñ ne dil meñ tire ghar apnā kiyā hai
bāhar hai do-ālam se mirī jaañ vatan un kā
har baat meñ vo chaal kiyā karte haiñ mujh se
ulfat na nibhegī jo yahī hai chalan un kā
aariz se ġharaz ham ko anādil ko hai gul se
hai kūcha-e-māshūq hamārā chaman un kā
hai saaf nigāhoñ se ayaañ josh-e-javānī
āñkhoñ se sambhaltā nahīñ mastāna-pan un kā
ye sharm ke ma.anī haiñ hayā kahte haiñ is ko
āġhosh-e-tasavvur meñ na aayā badan un kā
ġhairoñ hī pe chaltā hai jo ab naaz kā ḳhanjar
kyuuñ beach meñ laayā thā mujhe bāñkpan un kā
ġhairoñ ne kabhī paak nazar se nahīñ dekhā
vo us ko na samjheñ to ye hai husn-e-zan un kā
is zulf-o-ruḳh-o-lab pe unheñ kyuuñ na ho naḳhvat
tātār hai un kā halab un kā yaman un kā
allāh re fareb-e-nazar-e-chashm-e-fusūñ-sāz
banda hai har ik shaiḳh har ik barahman un kā
aayā jo nazar husn-e-ḳhudā-dād kā jalva
but ban gayā muñh dekh ke har barahman un kā
marqad meñ utārā hameñ tevrī ko chaḌhā kar
ham mar bhī ga.e par na chhuTā bāñkpan un kā
guzrī huī bāteñ na mujhe yaad dilāo
ab zikr hī jaane do tum ai jān-e-man un kā
dilchasp hī aafat hai qayāmat hai ġhazab hai
baat un kī adā un kī qad un kā chalan un kā