ye dil machal gayā to hamārā banegā kyā
sūraj pighal gayā to hamārā banegā kyā
is dil meñ le ke baiThe haiñ kab se tumhārī yaad
ye dil hī jal gayā to hamārā banegā kyā
uljhāv aa gayā hai muravvat kī Dor meñ
is kā na bal gayā to hamārā banegā kyā
is zindagī kī qadr to bas ek pal lagī
gar ye bhī pal gayā to hamārā banegā kyā
tukkā lagā ki ham ne jo izzat bachā.ī thī
gar tiir chal gayā to hamārā banegā kyā
rokā huā hai ham ne abhī dil meñ ishq ko
ye jin nikal gayā to hamārā banegā kyā
'ahmad' na soch kuchh ki zamāna hai bevafā
ye din badal gayā to hamārā banegā kyā