aisā ek maqām ho jis meñ dil jaisī vīrānī ho
yādoñ jaisī tez havā ho dard se gahrā paanī ho
ek sitāra raushan ho jo kabhī na bujhne vaalā ho
rasta jānā-pahchānā ho raat bahut an-jānī ho
vo ik pal jo biit gayā us meñ hī raheñ to achchhā hai
kyā ma.alūm jo pal aa.e vo faanī ho lāfānī ho
manzar dekhne vaalā ho par koī na dekhne vaalā ho
koī na dekhne vaalā ho aur duur talak hairānī ho
ek ajiib samāñ ho jaise sher 'munīr'-niyāzī kā
ek taraf ābādī ho aur ek taraf vīrānī ho