ye jo ik shāḳh hai harī thī abhī
us jagah par koī parī thī abhī
sar-basar rañg-o-nūr se labrez
ik surāhī yahāñ dharī thī abhī
ḳhaak kaisī hai mere paañv tale
saat rañgoñ kī ik darī thī abhī
is ḳharābe meñ koī aur bhī hai
aah kis ne yahāñ bharī thī abhī
sāneha koī yaañ se guzrā hai
ye fazā kyuuñ Darī Darī thī abhī
maiñ basātā thā us ke dil meñ ghar
aur qismat meñ be-gharī thī abhī
kyuuñ na karte ham us kī dildārī
us meñ kuchh ḳhū-e-dilbarī thī abhī