ḳhulūs pyaar vafā dostī sila kyā hai
haTāo aisī hikāyāt meñ dharā kyā hai
sharīf logoñ kī pagḌī uchhālte phirnā
hamāre ahd ke bachchoñ kā mashġhala kyā hai
mujhe ye bojh uThāne kī hai zarūrat kyā
har aadmī mire baare meñ sochtā kyā hai
sabhī ne bhiiḌ meñ ik dūsre pe vaar kiyā
kisī ne ye nahīñ pūchhā ki vāqi.a kyā hai
na dil meñ yaad na āñkhoñ meñ koī ḳhvāb-e-sahar
bikharte jism ke malbe meñ DhūñDhtā kyā hai