vaqt majbūr apnī aadat se
badle lamhoñ ko apnī chāhat se
kab rahā shauq jītne kā hameñ
hārte hī rahe haiñ qismat se
us kī hī be-ruḳhī kā hai anjām
ham hue duur us kī ulfat se
dard ġham rañj aaheñ ḳhāmoshī
aur paayā hai kyā mohabbat se
us ne kar lī hī ḳhud-kushī āḳhir
thā pareshāñ vo apnī ġhurbat se
do nigāhoñ se daañv khelā phir
le ga.e dil ko vo sharārat se
ham ko banñā zamāne ke jaisā
aa ga.e tañg ham sharāfat se
'sārthī' tū bhī ab badal ḳhud ko
siikh kuchh to badaltī qudrat se