dard kī intihā nahīñ ma.alūm
hashr kyūñkar uThā nahīñ ma.alūm
kaun hai āshnā nahīñ ma.alūm
kaun degā daġhā nahīñ ma.alūm
vo to ruḳhsat hue gale mil kar
kab Talegī balā nahīñ ma.alūm
ai masīhā mirā ilaaj na kar
tujh ko merī davā nahīñ ma.alūm
dostoñ kā ḳhulūs yaad rahā
dushmanoñ kī adā nahīñ ma.alūm
phuul murjhā ga.e gulistāñ ke
kaisā jhoñkā chalā nahīñ ma.alūm
kis ko maiñ bā-vafā kahūñ 'maikash'
kaun hai bā-vafā nahīñ ma.alūm