jalan ke ḳhauf se bāhar nikal sako to chalo

bichhī hai dhuup hī rastoñ meñ chal sako to chalo

yahī taqāzā hai is baar bhī mohabbat kā

badan pe gard-e-safar ko jo mal sako to chalo

jalā ke zillat-e-shab meñ hatheliyoñ pe charāġh

havā ke ruḳh ko agarche badal sako to chalo

milā hai izn-e-masāfat kaḌe añdheroñ meñ

kisī charāġh kī lau meñ jo Dhal sako to chalo

ḳhayāl rakhnā ajal āḳhirī paḌāv nahīñ

azāb-e-umr se bāhar nikal sako to chalo

bahut hī TeḌhā hai ai dost ishq kā rasta

baġhair rāh-numā ke sambhal sako to chalo

is ek shart pe gulshan meñ dāḳhila hogā

kisī gulāb ke sāñche meñ Dhal sako to chalo

har ek gaam pe bikhrī hai raakh sadiyoñ kī

'nabīl' ban ke sharāra jo jal sako to chalo