hare haiñ zaḳhm kuchh is tarah bhī mire sar ke

tamām umr uThā.e haiñ naaz patthar ke

lahūluhān huā hai mirā badan yuuñ bhī

pakaḌ na paayā kabhī haath maiñ sitamgar ke

bas ek harf-e-muqarrar ke jurm meñ ham ne

zabāñ pe vaar hazāroñ sahe haiñ ḳhanjar ke

vo log laayā gayā hai jinheñ barābar meñ

kisī tarah bhī nahīñ the mire barābar ke

kuchh aise zaḳhm bhī sar ko jhukā ke khaa.e haiñ

jo mire baḳht ke the aur na the muqaddar ke

yahī utāreñge manzil pe ek din mujh ko

ye jitne zaḳhm haiñ paañv meñ mire Thokar ke

'nabīl' aaj vo sar pe savār haiñ mere

jo log ghar meñ basā.e the maiñ ne bāhar ke