ham alag sī ek ḳhushbū jānte haiñ

haiñ barahman aur urdu jānte haiñ

kaam chup rah ke kiyā karte haiñ lekin

raat ke sab raaz jugnū jānte haiñ

ḳhāmushī se aa gire dāman pe aksar

dard kī shiddat ko aañsū jānte haiñ

kyoñ mahaktā hai chaman aamad se terī

phuul bhī kyā terī ḳhushbū jānte haiñ

arziyāñ kab roknā hai kab baḌhānā

ye hunar daftar ke baabū jānte haiñ

mushkiloñ meñ muskurā ke jiine vaale

phir yaqīnan koī jaadū jānte haiñ