umr bhar kuchh ḳhvāb dil par dastakeñ dete rahe

ham ki majbūr-e-vafā the āhaTeñ sunte rahe

jab taḳhayyul isti.āroñ meñ Dhalā to shahr meñ

der tak husn-e-bayāñ ke tazkire hote rahe

diip yādoñ ke jale to ek bechainī rahī

itnī bechainī ki shab bhar karvaTeñ lete rahe

ek uljhan raat din paltī rahī dil meñ ki ham

kis nagar kī ḳhaak the kis dasht meñ Thahre rahe

ham 'baqā' ik ret kī chādar ko oḌhe der tak

dasht-e-māzī ke sunahre ḳhvāb meñ kho.e rahe