charāġh dil kā muqābil havā ke rakhte haiñ

har ek haal meñ tevar balā ke rakhte haiñ

milā diyā hai pasīna bhale hī miTTī meñ

ham apnī aañkh kā paanī bachā ke rakhte haiñ

hameñ pasand nahīñ jañg meñ bhī makkārī

jise nishāne pe rakkheñ batā ke rakhte haiñ

kahīñ ḳhulūs kahīñ dostī kahīñ pe vafā

baḌe qarīne se ghar ko sajā ke rakhte haiñ

anā-pasand haiñ 'hastī'-jī sach sahī lekin

nazar ko apnī hamesha jhukā ke rakhte haiñ