vo bhī chup-chāp hai is baar ye qissa kyā hai
tum bhī ḳhāmosh ho sarkār ye qissa kyā hai
sirf nafrat hī thī mere liye jin ke dil meñ
ho ga.e vo bhī taraf-dār ye qissa kyā hai
sāmne koī bhañvar hai na talātum phir bhī
chhūTtī jaa.e hai patvār ye qissa kyā hai
baiThte jab haiñ khilaune vo banāne ke liye
un se ban jaate haiñ hathiyār ye qissa kyā hai
vo jo qisse meñ thā shāmil vahī kahtā hai mujhe
mujh ko ma.alūm nahīñ yaar ye qissa kyā hai