ḳhudā ne kyuuñ dil-e-dard-āshnā diyā hai mujhe
is āgahī ne to pāgal banā diyā hai mujhe
tumhī ko yaad na kartā to aur kyā kartā
tumhāre ba.ad sabhī ne bhulā diyā hai mujhe
sa.ūbatoñ meñ safar kī kabhī jo niiñd aa.ī
mire badan kī thakan ne uThā diyā hai mujhe
maiñ vo charāġh huuñ jo āñdhiyoñ meñ raushan thā
ḳhud apne ghar kī havā ne bujhā diyā hai mujhe
bas ek tohfa-e-iflās ke sivā 'sāqī'
mashaqqatoñ ne mirī aur kyā diyā hai mujhe