charāġh jalte nahīñ haiñ jalā.e jaate haiñ

ye ashk bahte nahīñ haiñ bahā.e jaate haiñ

jab un kī bazm meñ pahuñche to ye huā ma.alūm

yahāñ charāġh nahīñ dil jalā.e jaate haiñ

ḳhizāñ ke ḳhauf se lutf-e-bahār kyoñ chhoḌeñ

yahī to soch ke gul muskurā.e jaate haiñ

shab-e-firāq kī be-tābiyāñ na pūchh hameñ

kuchh aise zaḳhm haiñ jo dil ko khaa.e jaate haiñ

samāñ ab aa gayā sone kā ġhāliban 'ḳhurshīd'

charāġh shaam ke ghar ghar bujhā.e jaate haiñ