ḳhud apne aap se rūThā huā huuñ

samajhte haiñ vo maiñ un se ḳhafā huuñ

haqā.eq se churā kar aañkh apnī

maiñ kin sāyoñ ke pīchhe bhāgtā huuñ

koī to rāsta hogā batānā

tire dil tak pahuñchnā chāhtā huuñ

ba-zāhir hai hañsī hoñToñ pe mere

magar andar se maiñ TuuTā huā huuñ

jahāñ ḳhud ko muqaffal kar rakhā thā

maiñ us kamre kī chābī kho chukā huuñ

ye kis ne mujh ko bas meñ kar liyā hai

ishāroñ par maiñ kis ke chal rahā huuñ

agarche haal hai tārīk merā

sitāra aane vaale vaqt kā huuñ

tapā huuñ ātish-e-daurāñ meñ 'nāyāb'

to ab jā kar kahīñ kundan banā huuñ