dil-e-vahshī kā afsāna kahegā tum bhī sun lenā

junūñ ke raaz dīvāna kahegā tum bhī sun lenā

vo dil jis se miTā.e de rahe ho yaad tum apnī

zamāna us ko vīrāna kahegā tum bhī sun lenā

zabān-e-ḳhalq kā shāyad na tum ko e'tibār aa.e

ḳhud apnā haal dīvāna kahegā tum bhī sun lenā

dil-e-nazzārā jo har baat us husn-e-mujassam se

ba-andāz-e-kalīmāna kahegā tum bhī sun lenā

'munavār' bahkī bahkī guftugū yūñhī kiye jaao

tumheñ har shaḳhs dīvāna kahegā tum bhī sun lenā