dil kī ho dil se mulāqāt bahut mushkil hai

aur sab sahl hai ye baat bahut mushkil hai

ishq vāloñ kī to dāvat hai junūñ se mumkin

husn vāloñ kī mudārāt bahut mushkil hai

bazm-e-fitrat ke bhī aa.iin kahīñ badle haiñ

sab ke mābain musāvāt bahut mushkil hai

jeb ḳhālī ho to ik lamha bhī hotā hai pahāḌ

muflisī meñ basar-auqāt bahut mushkil hai

hadiya-e-ġham haiñ 'munavār' mire dil ke TukḌe

koī Thukrā.e ye sauġhāt bahut mushkil hai