dīdanī hai hamārī zebā.ī
ham ki haiñ husn ke tamannā.ī
bas ye hai intihā ta.alluq kī
zikr par un ke aañkh bhar aa.ī
tū na kar apnī mahfiloñ ko udaas
raas hai ham ko rañj-e-tanhā.ī
ham to kah deñ 'salīm' haal tirā
kab vahāñ hai kisī kī shunvā.ī
aur to kyā diyā bahāroñ ne
bas yahī chaar din kī rusvā.ī
ham ko kyā kaam rañg-e-mahfil se
ham to haiñ duur ke tamāshā.ī
vo junūñ ko baḌhā.e jā.eñge
un kī shohrat hai merī rusvā.ī
mo'taqid haiñ hamārī vahshat ke
shahr meñ jis qadar haiñ saudā.ī
ishq sāhib ne dil pe dastak dī
aa.i.e murshidī o maulā.ī
ye zamāne kā jabr hai ki 'salīm'
ho ke mere bane haiñ saudā.ī