'salīm' dasht-e-tamannā meñ kaun hai kis kā
yahāñ to ishq bhī tanhā hai husn bhī tanhā
bane vo baat ki ahl-e-vafā ke din phir jaa.eñ
mizāj-e-yār kī sūrat badal chale duniyā
uḌā ke le hī ga.iiñ bū-e-pairahan! terā
subuk-ḳhirām havāoñ pe koī bas na chalā
mizāj-e-ishq ho mānūs-e-zindagī itnā
ki misl-e-ḳhalvat-e-mahbūb ho bharī duniyā
misāl-e-sub.h mirī ḳhalvatoñ meñ kaun aayā
vo raushnī hai ki palkeñ jhapak rahī hai fazā
hamīñ pe jab na tavajjoh huī to ham ko kyā
balā se aap kisī ke liye hoñ qahr-o-balā
vo tū hai yaad tirī hai ki merī hasrat hai
ye kaun hai mire siine meñ siskiyāñ letā
kuḌhe to apnī jagah ḳhush rahe to apnī jagah
'salīm' ham ne kisī se na kuchh kahā na sunā