liyā na haath se jis ne salām āshiq kā

vo kaan dhar ke sune kyā payām āshiq kā

qusūr-e-shaiḳh hai firdaus o huur kī ḳhvāhish

tirī galī meñ hai pyāre maqām āshiq kā

ġhurūr-e-husn na kar jazba-e-zuleḳhā dekh

kiyā hai ishq ne yūsuf ġhulām āshiq kā

tire hī naam kī simran hai mujh ko aur tasbīh

tū hī hai vird har ik sub.h-o-shām āshiq kā

vafūr-e-ishq ko āshiq hī jāntā hai 'nasīr'

har ik samajh nahīñ saktā kalām āshiq kā