pyaar meñ us ne to dānista mujhe khoyā thā
jaane kyuuñ phir vo akele meñ bahut royā thā
us ko bhī niiñd nahīñ aa.ī bichhaḌ kar mujh se
āḳhirī baar vo bāñhoñ meñ mirī soyā thā
mere ashkoñ meñ rahā vo bhī barābar kā sharīk
maiñ ne ye bojh akele hī nahīñ Dhoyā thā
raat bhar tujh ko sunātā rahā merā qissa
raat bhar chāñd darīche meñ tire goyā thā
phuul nafrat ke uge haiñ to ta.ajjub kaisā
tum ne ulfat kā koī biij kahāñ boyā thā
ḳhat pe Tapke hue aañsū ye batāte haiñ 'shakīl'
merī tahrīr ko bārish ne nahīñ dhoyā thā