vafā kī raah meñ aise kamāl kartī huuñ
na koī shikva na koī savāl kartī huuñ
maiñ roz tāroñ se dāman sajātī huuñ apnā
bahut salīqe se apnā ḳhayāl kartī huuñ
ye kab talak yuuñ hī nafrat kā khel kheloge
maiñ leaderoñ se yahī ik savāl kartī huuñ
ġhamoñ ko apnī maiñ ġhazloñ meñ Dhāltī huuñ bas
ye duniyā vaale kahe ki kamāl kartī huuñ
udāsiyoñ se sadā rakh ke fāsle 'jyotī'
maiñ aise ziist hasīñ pur-jamāl kartī huuñ