tum ne jo sochā hai vaisā hī sahī
ishq jhūThā hai to jhūThā hī sahī
us se har haal nibhānā hai mujhe
vo jo kaḌvā hai to kaḌvā hī sahī
chāñd-tāre to nahīñ qismat meñ
miTTī kā ek khilaunā hī sahī
mere jazbāt tamāsha haiñ agar
chal to phir aur tamāsha hī sahī
ik ajab dil ko sukūñ detā hai
milnā ham donoñ kā sapnā hī sahī
mujh ko hai naaz ki kuchh to huuñ maiñ
'jyotī' qatra hai to qatra hī sahī