mahsūs kar rahā huuñ tujhe ḳhushbuoñ se maiñ

āvāz de rahā huuñ baḌe fāsloñ se maiñ

mujh ko mire vajūd se koī nikāl de

tañg aa chukā huuñ roz ke in hādsoñ se maiñ

ye aur baat tujh ko nahīñ pā sakā magar

aayā tire qarīb ka.ī rāstoñ se maiñ

tai ho sakegā mujh se na ye zaat kā safar

mānūs ho na pā.ūñgā tanhā.iyoñ se maiñ

hai merā chehra saikaḌoñ chehroñ kā ā.īna

bezār ho gayā huuñ tamāshā.iyoñ se maiñ