sirf terā naam le kar rah gayā

aaj dīvāna bahut kuchh kah gayā

kyā mirī taqdīr meñ manzil nahīñ

fāsla kyuuñ muskurā kar rah gayā

zindagī duniyā meñ aisā ashk thī

jo zarā palkoñ pe Thahrā bah gayā

aur kyā thā us kī pursish kā javāb

apne hī aañsū chhupā kar rah gayā

us se pūchh ai kāmyāb-e-zindagī

jis kā afsāna adhūrā rah gayā

haa.e kyā dīvāngī thī ai 'vasīm'

jo na kahnā chāhiye thā kah gayā