tumheñ ġhamoñ kā samajhnā agar na aa.egā
to merī aañkh meñ aañsū nazar na aa.egā
ye zindagī kā musāfir ye be-vafā lamha
chalā gayā to kabhī lauT kar na aa.egā
baneñge ūñche makānoñ meñ baiTh kar naqshe
to apne hisse meñ miTTī kā ghar na aa.egā
manā rahe haiñ bahut din se jashn-e-tishna-labī
hameñ patā thā ye bādal idhar na aa.egā
lagegī aag to samt-e-safar na dekhegī
makān shahr meñ koī nazar na aa.egā
'vasīm' apne añdheroñ kā ḳhud ilaaj karo
koī charāġh jalāne idhar na aa.egā