tujhe bhī husn-e-mutlaq kā abhī dīdār ho jaa.e

mire mahbūb ke jo rū-ba-rū ik baar ho jaa.e

sukūn-o-chain mil jaa.e ḳhudā bhī yaar ho jaa.e

agar insān meñ insāniyat bedār ho jaa.e

lahū meñ garam-joshī rakh qalam meñ zor paidā kar

nahīñ to har qadam par ik na.ī dīvār ho jaa.e

qalandar huuñ mujhe shohrat kī chāhat hī nahīñ varna

maiñ rakh duuñ jis ke sar par haath vo sardār ho jaa.e

sunā hai dard se 'ahyā' qalam meñ zor miltā hai

so maiñ ne bhī duā kar lī mujhe bhī pyaar ho jaa.e