apnī ġhazloñ ko risāloñ se alag rakhtā huuñ

yaanī ye phuul kitāboñ se alag rakhtā huuñ

haañ buzurgoñ se aqīdat to mujhe hai lekin

mushkileñ apnī mazāroñ se alag rakhtā huuñ

manzileñ aa ke mere paañv meñ gir jaatī haiñ

hausla jab maiñ thakānoñ se alag rakhtā huuñ

un kī aamad kā pata detī hai ḳhushbū un kī

us ghaḌī ḳhud ko jahānoñ se alag rakhtā huuñ

hosh vaale mujhe apnoñ meñ ginā karte haiñ

maiñ kahāñ ḳhud ko dīvānoñ se alag rakhtā huuñ

mujh ko achchhā nahīñ lagtā ye umīdeñ TūTeñ

is liye tiir kamānoñ se alag rakhtā huuñ