ḳhvāb-gāhoñ se azān-e-fajr Takrātī rahī
din chaḌhe tak ḳhāmushī mimbar pe chillātī rahī
ek lamhe kī ḳhatā phailī to saarī zindagī
chubhte zarre kāñch ke palkoñ se chunvātī rahī
kab yaqīñ thā koī aa.egā magar zālim havā
band darvāze ko dastak de ke khulvātī rahī
lams-e-harf-o-saut kī lazzat se vāqif thī magar
pahlū-e-āvāz meñ taḳh.īl sharmātī rahī
sūrateñ aisī ki jin ke ik tasavvur se 'zahīr'
jism ke dariyā kī ik ek mauj bal khātī rahī