vajūd us kā kabhī bhī na luqma-e-tar thā
vo har nivāle meñ dāñtoñ ke biich kañkar thā
alag alag the dil o zehn bad-nasīboñ ke
ajiib baat hai har dhaḌ pe ġhair kā sar thā
na jaane ham se gila kyuuñ hai tishna-kāmoñ ko
hamāre haath meñ mai thī na daur-e-sāġhar thā
lahūluhān hī kar detā pā-e-laġhzish ko
subūt detā ki vo rāste kā patthar thā
bahut hī ḳhuub thā vo indimāl se pahle
ki zaḳhm-e-tāza to dāġh-e-siyah se behtar thā
qarīb ḳhatm thā gulshan kā kārobār 'zahīr'
rag-e-gulū ko magar intizār-e-ḳhanjar thā