na mil sakā tarī lahroñ meñ bhī qarār mujhe
samundar apnī tahoñ meñ zarā utaar mujhe
havā ke paañv kī aahaT gulāb kī chīḳheñ
sunī haiñ maiñ ne adālat zarā pukār mujhe
maiñ baar baar tire vāste bikhar jā.ūñ
tū baar baar mire ā.īne sañvār mujhe
falak ko toḌ duuñ maiñ apnī aah se lekin
zamīn vāloñ se be-intihā hai pyaar mujhe
ik us kī zaat se jab merā e'tibār uThā
to phir kisī pe bhī aayā na e'tibār mujhe