jab na shīsha hai na sāġhar hai na paimāna mirā

kis tarah kah duuñ ye mai-ḳhāna hai mai-ḳhāna mirā

chhup sakegā baaġh meñ kyūñkar mirī vahshat kā haal

patte patte kī zabāñ kahtī hai afsāna mirā

haiñ makīñ ab bhī dil-e-mahzūñ meñ lākhoñ hasrateñ

ḳhair se hai aaj bhī ābād vīrāna mirā

ho bhalā kyūñkar ayaañ merī haqīqat aap par

aap aksar ġhair se sunte haiñ afsāna mirā

sāqiyā ho is taraf bhī ik ināyat kī nazar

tak rahā hai tujh ko kis hasrat se paimāna mirā

maiñ tirā mamnūn huuñ ai sho.ala-e-barq-e-tapāñ

tere dam se ho gayā pur-nūr kāshāna mirā

dostoñ kī baat kyā hai dost to phir dost the

dushmanoñ se bhī rahā 'ummīd' yārāna mirā