dafn jab ḳhaak meñ ham soḳhta-sāmāñ hoñge
fils maahī ke gul-e-sham-e-shabistāñ hoñge
nāvak-andāz jidhar dīda-e-jānāñ hoñge
nīm-bismil ka.ī hoñge ka.ī be-jāñ hoñge
tāb-e-nazzāra nahīñ aa.ina kyā dekhne duuñ
aur ban jā.eñge tasvīr jo hairāñ hoñge
tū kahāñ jā.egī kuchh apnā Thikāna kar le
ham to kal ḳhvāb-e-adam meñ shab-e-hijrāñ hoñge
nāsehā dil meñ tū itnā to samajh apne ki ham
laakh nādāñ hue kyā tujh se bhī nādāñ hoñge
kar ke zaḳhmī tujhe nādim huuñ ye mumkin hī nahīñ
gar vo hoñge bhī to be-vaqt pashemāñ hoñge
ek ham haiñ ki hue aise pashemān ki bas
ek vo haiñ ki jinheñ chaah ke armāñ hoñge
ham nikāleñge sun ai mauj-e-havā bal terā
us kī zulfoñ ke agar baal pareshāñ hoñge
sabr yā rab mirī vahshat kā paḌegā ki nahīñ
chāra-farmā bhī kabhī qaidi-e-zindāñ hoñge
minnat-e-hazrat-e-īsā na uThā.eñge kabhī
zindagī ke liye sharminda-e-ehsāñ hoñge
tere dil-tafta kī turbat pe adū jhūTā hai
gul na hoñge sharar-e-ātash-e-sozāñ hoñge
ġhaur se dekhte haiñ tauf ko āhu-e-haram
kyā kaheñ us ke sag-e-kūcha ke qurbāñ hoñge
dāġh-e-dil nikleñge turbat se mirī juuñ laala
ye vo aḳhgar nahīñ jo ḳhaak meñ pinhāñ hoñge
chaak parde se ye ġhamze haiñ to ai parda-nashīñ
ek maiñ kyā ki sabhī chāk-e-garebāñ hoñge
phir bahār aa.ī vahī dasht-navardī hogī
phir vahī paañv vahī ḳhār-e-muġhīlāñ hoñge
sañg aur haath vahī vo hī sar o dāġh-e-junūn
vo hī ham hoñge vahī dasht o bayābāñ hoñge
umr saarī to kaTī ishq-e-butāñ meñ 'momin'
āḳhirī vaqt meñ kyā ḳhaak musalmāñ hoñge