jaltā huuñ hijr-e-shāhid o yād-e-sharāb meñ
shauq-e-savāb ne mujhe Daalā azaab meñ
kahte haiñ tum ko hosh nahīñ iztirāb meñ
saare gile tamām hue ik javāb meñ
phailī shamīm-e-yār mire ashk-e-surḳh se
dil ko ġhazab fishār huā pech-o-tāb meñ
chīn-e-jabīñ ko dekh ke dil basta-tar huā
kaisī kushūd-e-kār kushād-e-naqāb meñ
ham kuchh to bad the jab na kiyā yaar ne pasand
ai hasrat is qadar ġhalatī intiḳhāb meñ
rahte haiñ jamā kūcha-e-jānāñ meñ ḳhaas o aam
ābād ek ghar hai jahān-e-ḳharāb meñ
aañkh us kī phir ga.ī thī dil apnā bhī phir gayā
ye aur inqilāb huā inqilāb meñ
badnām mere girya-e-rusvā se ho chuke
ab uzr kyā rahā nigah-e-be-hijāb meñ
matlab kī justujū ne ye kyā haal kar diyā
hasrat bhī ab nahīñ dil-e-nākām-yāb meñ
goyā ki ro rahā huuñ raqīboñ kī jaan ko
ātish zabāna-zan huī tūfān-e-āb meñ
nākāmiyoñ se kaam rahā umr bhar hameñ
piirī meñ yaas hai jo havas thī shabāb meñ
hai iḳhtiyār-e-yār meñ suud o ziyāñ magar
fāzil the ham jahāñ se qazā ke hisāb meñ
nāseh hai aib-jū o dil-āzār is qadar
goyā savāb hai suḳhan-e-nā-savāb meñ
donoñ kā ek haal hai ye mudda.ā ho kaash
vo hī ḳhat us ne bhej diyā kyuuñ javāb meñ
taqdīr bhī burī mirī taqrīr bhī burī
bigḌe vo pursish-e-sabab-e-ijtināb meñ
kyā jalve yaad aa.e ki apnī ḳhabar nahīñ
be-bāda mast huuñ maiñ shab-e-māhtāb meñ
hai minnatoñ kā vaqt shikāyat rahī rahī
aa.e to haiñ manāne ko vo par itaab meñ
terī jafā na ho to hai sab dushmanoñ se amn
badmast ġhair mahv dil aur baḳht ḳhvāb meñ
paiham sujūd pā-e-sanam par dam-e-vidā
'momin' ḳhudā ko bhuul ga.e iztirāb meñ