tire āsmāñ kī zamīñ ho gayā huuñ

huā huuñ to apne ta.iiñ ho gayā huuñ

milī hai jagah dil meñ thoḌī sī us ke

samajh lo ki gosha-nashīñ ho gayā huuñ

yahāñ par maiñ honā nahīñ chāhtā thā

magar hote hote yahīñ ho gayā huuñ

tire paañv paḌne se inkār kar duuñ

maiñ itnā to ḳhud-sar nahīñ ho gayā huuñ

jahāñ mujh ko hone se rokā thā us ne

nahīñ baaz aayā vahīñ ho gayā huuñ

makāñ jis kā naqsha abhī ban rahā hai

maiñ filhāl us kā makīñ ho gayā huuñ

tavajjoh kā tālib huuñ is tarah se bhī

agar aap kā nukta-chīñ ho gayā huuñ

buḌhāpe se aglī ye manzil hai koī

javāñ ho gayā huuñ hasīñ ho gayā huuñ

ise bhī 'zafar' merī himmat hī samjho

kahīñ ho na paayā kahīñ ho gayā huuñ