tire laboñ pe agar surḳhi-e-vafā hī nahīñ

to ye banāo ye saj dhaj tujhe ravā hī nahīñ

maiñ terī ruuh kī pattī kī tarah kaañp gayā

havā-e-sub.h-e-subuk-gām ko patā hī nahīñ

kisī umiid ke phūloñ bhare shabistāñ se

jo aañkh mal ke uThā huuñ to vo huā hī nahīñ

farāz-e-shām se girtā rahā fasāna-e-shab

gadā-e-gauhar-e-guftār ne sunā hī nahīñ

chamak rahā hai mirī zindagī kā har lamha

maiñ kyā karūñ ki mirī aañkh meñ ziyā hī nahīñ