rafta rafta sab manāzir kho ga.e achchhā huā
shor karte the parinde so ga.e achchhā huā
koī aahaT koī dastak kuchh nahīñ kuchh bhī nahīñ
bhūlī bisrī ik kahānī ho ga.e achchhā huā
ek muddat se hamāre ā.īne pe gard thī
āñsuoñ ke sail us ko dho ga.e achchhā huā
bekalī koī na thī to dil baḌā be-zār thā
ab havādis dard is meñ bo ga.e achchhā huā
rañg apnā ho numāyāñ shauq bejā thā hameñ
rāstoñ kī dhuul meñ ham kho ga.e achchhā huā
be-sabab rotā thā 'fikrī' aur rulātā thā hameñ
ab zamāna ho gayā us ko ga.e achchhā huā