ḳhunuk havā kā ye jhoñkā sharār kaise huā
ye merā shahr dukhoñ kā dayār kaise huā
bujhe bujhe the bahut naqsh jab ki mausam ke
lahū ke rañg kā un pe nikhār kaise huā
banā huuñ jis se ḳhatā-kār sab kī ā.ankhoñ meñ
vo jurm mujh se batā baar baar kaise huā
milā na jis ko bulāvā kabhī samundar kā
vo shaḳhs mauj-e-balā kā shikār kaise huā
ba-shakl-e-umr milī bhiik jis se lamhoñ kī
vo vaqt mere liye be-kanār kaise huā
vo jism jis pe bahut naaz thā tujhe 'fikrī'
vo jism dasht-e-fanā kā ġhubār kaise huā