kahāñ kahāñ se guzar rahā huuñ

maiñ āñdhiyoñ meñ bikhar rahā huuñ

kisī bhī sūrat na chain pā.ūñ

ye kis tajassus meñ mar rahā huuñ

maiñ surḳhiyoñ meñ kahāñ se hotā

maiñ hāshiye kī ḳhabar rahā huuñ

sabhoñ ko jaanā hai paar lekin

maiñ paar jaane se Dar rahā huuñ

na merī manzil na koī jaada

azal se gard-e-safar rahā huuñ

mujhe to marnā thā ġham meñ 'fikrī'

maiñ ġham meñ jal kar nikhar rahā huuñ