kuchh shafaq Dūbte sūraj kī bachā lī jaa.e
rañg-e-imkāñ se koī shakl banā lī jaa.e
harf mohmal sā koī haath pe us ke rakh do
qahat kaisā hai ki har saañs savālī jaa.e
shahr-e-malbūs meñ kyuuñ itnā barhana rahiye
koī chhat yā koī dīvār-e-ḳhayālī jaa.e
saath ho letā hai har shaam vahī sannāTā
ghar ko jaane kī na.ī raah nikālī jaa.e
pheñk āñkhoñ ko kisī jhiil kī gahrā.ī meñ
but koī soch ki āvāra ḳhayālī jaa.e
tishna-e-zaḳhm na rahne de badan ko 'ahmad'
aisī talvār sar-e-shahr uchhālī jaa.e